សៀមរាប៖ រដ្ឋបាលខេត្តសៀមរាប ច្រានចោលព័ត៌មានពាក់ព័ន្ធករណីសិស្សធ្វើអត្ដឃាតដោយចងកសម្លាប់ខ្លួននៅភូមិដូនឪ ឃុំលាងដៃ ស្រុកអង្គរធំ ខេត្តសៀមរាប ដែលបណ្ដាលមកពីការប្រឡងបាក់ឌុបធ្លាក់។ រដ្ឋបាលខេត្តបញ្ជាក់ថាករណីនេះកើតឡើងតាំងពីឆ្នាំ២០១៨ ហើយក៏មិនទាក់ទងនឹងការប្រឡងបាក់ឌុបធ្លាក់ដែរ។

ក្នុងសេចក្តីប្រកាសព័ត៌មានចុះថ្ងៃទី២៣ ខែធ្នូ ឆ្នាំ២០២២ រដ្ឋបាលខេត្តសៀមរាបបានបដិសេធករណីធ្វើអត្តឃាតដោយចងក ខណៈមានអ្នកប្រើប្រាស់បណ្ដាញសង្គមមួយចំនួនបានផ្សព្វផ្សាយថា មានយុវនារីឈ្មោះ រស់ សំអុន បានចងកសម្លាប់ខ្លួន ព្រោះអន់ចិត្តនឹងប្រឡងធ្លាក់ ភូមិដូនឪ ឃុំលាងដៃ ស្រុកអង្គរធំ។

តាមការបញ្ជាក់ពីស្នងការដ្ឋាននគរបាលខេត្តសៀមរាបឱ្យដឹងថា ករណីនេះបានកើតឡើងពីឆ្នាំ២០១៨ ដោយវិបត្តិផ្លូវចិត្តក្នុងគ្រួសារ មិនពាក់ព័ន្ធការប្រឡងនោះឡើយ។

ជាមួយគ្នានេះ រដ្ឋបាលខេត្តសៀមរាប ស្នើដល់ម្ចាស់គណនីទាំងអស់ ដែលបានផុសផ្សព្វផ្សាយតាមបណ្តាញសង្គមឱ្យកែតម្រូវជាបន្ទាន់ ជៀសវាងការផ្សព្វផ្សាយ និងចែករំលែក (share) បន្តដោយគ្មានមូលដ្ឋាន ហើយអាចប្រឈមចំពោះមុខច្បាប់៕